എങ്ങനെ പഠിക്കണം

രസകരമായ ഒരു കഥയുണ്ട്. ഒരിടത്തൊരിടത്ത് ഒരു തച്ചനുണ്ടായിരുന്നു. അയാള്‍ക്ക് ഒരു മകളേയുള്ളു. പേര് സുന്ദരി. പതിവിന് വിപരീതമായി അനുരൂപമായ രൂപഭംഗിയുണ്ട്. യൗവ്വനം വന്നെത്തിയപ്പോഴേയ്ക്കും പല ചെറുപ്പക്കരും പെണ്ണുകാണാനെത്തി. തച്ചന് ഒരു നിബന്ധനയുണ്ട്. ഒരു പരീക്ഷയില്‍ വിജയിക്കുന്നവന് മാത്രമേ പെണ്ണിനെ നല്‍കു. സുന്ദരിയെ കല്യാണം കഴിക്കാനെത്തുന്നവരോട് തച്ചന്‍ മുറ്റത്തു കിടക്കുന്ന ഒരു മുഴുത്ത തടിക്കഷ്ണവും അതില്‍ ചാരിവച്ചിരിക്കുന്ന കോടാലിയും ചൂണ്ടിക്കാട്ടിയിട്ട് അയാള്‍ പറയും ‘പോയി അതൊന്നു വെട്ടിക്കീറുക.’ ‘ഹാ! ഇത്രേയുള്ളോ!’ പലരും ശ്രമിച്ചു – രണ്ടുമൂന്നുവെട്ടുകള്‍ കഴിയുമ്പോള്‍ തച്ചന്‍ പറയും ‘നിര്‍ത്തിയേക്കു’. അവര്‍ നിരാശരായി മടങ്ങും. ഇങ്ങനെയിരിക്കുമ്പോഴാണ് ഈ കഥയിലെ നായകന്റെ രംഗപ്രവേശം. അയാള്‍ ഒറ്റവെട്ടു മാത്രമേ വെട്ടിയുള്ളു. തടി പിളര്‍ന്നില്ല. പക്ഷേ തച്ചനു തൃപ്തിയായി. കാരണം എന്താണന്നല്ലേ. അവന്‍ തടിയുടെ അടുത്ത് ചെന്ന് ആദ്യമായി കോടാലി കൈയ്യിലെടുത്ത് അതിന്റെ പിടിയില്‍ മഴു ഉറച്ചിട്ടുണ്ടോ എന്നു പരിശോധിച്ചു. പിന്നീട് അതിനു മൂര്‍ച്ചയുണ്ടോ എന്നു നോക്കി. അതിനു ശേഷം തടിക്കഷണം തിരിച്ചും മറിച്ചും ഇട്ട് ഒരു പ്രത്യേക രീതിയില്‍ വച്ചു. കോടാലി ഉടക്കത്തക്കവണം വല്ല പ്രതിബന്ധവുമുണ്ടോ എന്ന് ചുറ്റിനും, മുകളിലും കണ്ണോടിച്ചു. എന്നിട്ട് കോടാലി ഉയര്‍ത്തി ഒറ്റ വെട്ട്. കണക്കിനേറ്റു- തച്ചന്‍ വിളിച്ചു പറഞ്ഞു ‘മതി മകനേ, സുന്ദരി നിനക്കുള്ളതാകുന്നു.’ ഇതുപോലെ വിജയശ്രീയെ പരിണയിക്കണോ? വിദ്യാര്‍ത്ഥിവിദ്യാര്‍ത്ഥിനികളേ, ഒരു തയ്യാറെടുപ്പ് അത്യാനശ്യമാണ്. 

 നിങ്ങള്‍ സ്വയം പരിശോധിച്ചു നോക്കു...

1. നിങ്ങള്‍ക്കു നല്ലവണ്ണം പഠിക്കാന്‍ തടസ്സമുണ്ടാക്കുന്ന വല്ല ശാരീരിക തകരാറുമുണ്ടോ? 

2. പഠിക്കാന്‍ നിങ്ങള്‍ക്ക് പ്രത്യേക സ്ഥലമുണ്ടോ ? 

3. നിങ്ങളുടെ മേശപ്പുറത്തോ പരിസരത്തോ പഠനത്തിനുള്ള ശ്രദ്ധയെ തടസ്സപ്പെടുത്തുന്ന വല്ലതുമുണ്ടോ? 

4. നിങ്ങള്‍ക്ക് ഓരോ ദിവസത്തേക്കും പഠിച്ചു തീര്‍ക്കുവാനുള്ള വിഷയത്തെപ്പറ്റി ആസൂത്രിത പദ്ധതി ഉണ്ടോ 

5. ഒരു കാര്യം മന:പാഠമാക്കാന്‍ ശ്രമിക്കുമ്പോള്‍ ഒറ്റയിരുപ്പിലിരുന്നു തീര്‍ക്കുമോ? 

6. പരീക്ഷയ്ക്ക് തൊട്ടുമുമ്പുള്ള കുറേ ദിവസങ്ങള്‍ മാത്രം വളരെ രാത്രിയാകുന്നതുവരെ ഇരുന്നു പഠിക്കുമോ?

7. നിങ്ങളുടെ പാഠ്യവിഷയങ്ങളില്‍ ഏതു വിഷയത്തിനാണു മോശം? ഏതാണ് കഠിനം? എത്രമാത്രം പഠിച്ചു എന്നെല്ലാം മുറയ്ക്ക് അപ ഗ്രഥനം നടത്താറുണ്ടോ? 

8. വായിക്കുമ്പോള്‍ ഗ്രാഫുകളും പട്ടികകളും പടങ്ങളും ശ്രദ്ധിക്കാറുണ്ടോ? 9. വായിക്കുന്ന ആശയങ്ങള്‍ ഓര്‍ത്തുവയ്ക്കാനുതകുന്നവണ്ണം ചെറിയ പഠങ്ങളോ കുറിപ്പുകളോ ഗ്രാഫുകളോ തയ്യാറാക്കുമോ? 

10. വായനയ്ക്കിടയില്‍ അറിഞ്ഞികൂടാത്ത വാക്കുകളുടെ അര്‍ത്ഥം ഡിഷ്ണറി നോക്കി മനസ്സിലാക്കാറുണ്ടോ?

11. വിശദമായി വായിക്കുന്നതിനുമുമ്പ് പഠിക്കേണ്ട ഭാഗം അദ്ധ്യായത്തിലെ ഉപശീര്‍ഷകങ്ങള്‍ , ഒന്ന് ഓടിച്ച് നോക്കാറുണ്ടോ?

12. വായിച്ചു തുടങ്ങുന്നതിന് മുമ്പു അദ്ധ്യായത്തിന്റെ ഒടുവില്‍ കൊടുത്തിരിക്കുന്ന സംഗ്രഹമോ ചോദ്യങ്ങളോ ശ്രദ്ധിക്കാറുണ്ടോ?

13. ആശയങ്ങളുടെ കുറിപ്പ് തയ്യാറാക്കാറുണ്ടോ?

14. ക്ലാസില്‍ വച്ചു കഴിയുന്നതും വേഗം പോയിന്റുകള്‍ കുറിച്ചിടാറുണ്ടോ?

15. വായിക്കുന്നതിന്റെ സംഗ്രഹം ഒറ്റവാചകത്തിലോ ചെറിയ ഖണ്ഡികയിലോ എഴുതി വയ്ക്കാറുണ്ടോ? 

16. പരീക്ഷയ്ക്ക് വരാവുന്ന ചോദ്യങ്ങള്‍ക്ക് ഉത്തരം പ്രത്യേകമായി തയ്യാറാക്കാറുണ്ടോ? 

17. പഠിക്കേണ്ടവ ഹൃദിസ്ഥമാക്കാന്‍ പ്രത്യേകം ശ്രമം നടത്താത്താറുണ്ടോ?

18. ഒരു കോഴ്‌സിനു വേണ്ടി പഠിച്ചു മറ്റൊന്നിനു വേണ്ടി ഉപയോഗപ്പെടുത്താന്‍ ശ്രമിക്കുമോ? 

19. നിങ്ങള്‍ നിങ്ങള്‍ക്കുവേണ്ടിയാണോ അതോ മാതാപിതാക്കളെ തൃപ്തിപ്പെടുത്താന്‍ വേണ്ടിയാണോ പഠിക്കുന്നത്? 

20 നിങ്ങള്‍ പഠിക്കുന്നത് രസിച്ചു പഠിക്കാറുണ്ടോ?

ഒരു ഗെയിം കളിക്കുന്നതുപോലെ. ഇവയുടെ ഉത്തരങ്ങള്‍ ഉണ്ട്, ഇല്ല എന്ന രീതിയില്‍ എഴുതി നോക്കുക. ഇവ നിങ്ങള്‍ക്കു സ്വന്തം പഠനരീതിയെപ്പറ്റി ഉള്‍ക്കാഴ്ച നല്‍കും. ഇവിടെ കാണിച്ചിരിക്കുന്നതില്‍ ചിലതൊത്തെ നിങ്ങള്‍ ചെയ്യുന്നുണ്ടാവാം. അതോര്‍ത്ത് അഭിമാനം കൊള്ളുക. അതോടൊപ്പം ചെയ്യേണ്ടിയിരിക്കുന്നതു കണ്ടുപിടിച്ചു പ്രയോഗിക്കുകയും ചെയ്യുക.